黃貫中（Paul）為幫自己嘅新唱片造勢，前晚特登同自己隊Band「汗」嘅成員恭碩良同Jimmy，一齊去咗旺角西洋菜街嘅一間鞋舖門口開騷。其實日本嘅歌手周不時喺鬧市唱歌，但喺香港就真係比較少見。前晚阿Paul喺八點黃金時間開騷，吸引咗成二百幾人捧場，除咗阿Paul忠實fans同旅客外，當然唔少得佢嘅女友朱茵啦，場面都幾墟冚。
阿Paul前晚搵咗十個保安維持秩序，不過，阿Paul同馮仁昭講，其實佢事前冇同警方申請，所以好擔心開騷嗰陣俾警方驅趕，好彩一切順利進行。阿Paul唱完兩首歌之後接受訪問時話：「未試過喺旺角街頭唱歌，平時見人攞住支結他通街咁唱，好羨慕。」而朱茵嗰晚亦表現得好興奮，佢大讚話阿Paul街頭獻唱好震撼，希望自己將來都有機會學似阿Paul咁做喎！
名模樂基兒同李嘉慧等噚日喺中環演出Espritfashionshow，樂基兒啱啱同森美、官恩娜拍電影《甜絲絲》，佢話拍戲同做模特兒一樣好玩，酬勞亦十分唔錯。講起拍《甜》片時，佢就話有一幕要錫森美，但俾對方拒絕，十分搞笑，佢笑話好彩現實中未試過俾男友拒絕。
噚日有網上消息話張栢芝拍完電影《無極》後會休息半年，去加拿大學英文。馮仁昭噚日同栢芝經理人公司中國星發言人李小姐求證，佢話：「栢芝九月中去完印度拍幾日賀歲片後，就會放兩個月假，佢想去外地休息兼學英文，因為佢覺得英文對一個演員發展海外市場特別重要。」栢芝又幾識諗，學好英文起碼唔會好似章子怡喺康城講英文出醜啦！
白靈同楊千嬅為咗宣傳電影《餃子三更2之一》而成為孖公仔，日前佢哋喺台灣機場出現，一直標榜自己係荷李活影星嘅白靈簡直自信爆燈，三十四歲嘅佢唔止將多種顏色着晒上身，重不施脂粉以素臉示人，如果佢唔係企喺千嬅隔籬，真係爭啲認佢唔出。而千嬅雖然淡施脂粉，但效果係─覺得三十歲嘅千嬅靚晒！
鄧兆尊噚日喺將軍澳電視廣播城開工，對於楚留香酒樓被某國際有限公司入稟法院追討二十萬港元一事，鄧兆尊就話：「我所有嘅嘢都交晒畀細佬去理，我都冇理，亦唔知有件咁嘅事，況且細佬都冇同我講，應該冇乜嘢問題。」
