隔晚美股生性，港股掂檔，恒指彈升168點。收市後長和系派半年成績表，又屬喜訊，估計會令港股更上一層樓。油價新高，炒家已經習慣咗，唔太重視，亦認為價高勢危，一旦油價急速回落，個市再有刺激因素，唔使好耐，恒指上攀萬三。
長實C輪：長實（001）盤數靚，股價若然唔係升得太多，買啲C輪短炒，對象例牌係9227，11月到期，輪價48仙，溢價2.1%，槓桿率12.8倍（有效9倍），引伸波幅25%。
其次9659，比較冷少少，明年1月到期，輪價76仙，溢價4.2%，槓桿率8.1倍（有效5.6倍），引伸波幅33%。
和黃C輪：和黃（013）成績表唔錯，股價若然唔係升得太多，則短期仍有水位。揀C輪炒炒，主角係9780，10月到期，輪價31仙，溢價1.9%，槓桿率18.4倍（有效12倍），引伸波幅24%。其次9811，亦係10月夠鐘，輪價38仙，溢價3.2%，槓桿率15倍（有效9.4倍），引伸波幅33%。呢件數據比唔上9780，但交投活躍買賣易則着番少少數。
中移動C輪：中移動（941）份中期成績表市場收貨，收21.75元，升兩格。股價落後大市，有機會追番些少失地，揀C輪炒，主角係9813，12月到期，輪價17.4仙，溢價4%，槓桿率12.5倍（有效7.6倍），引伸波幅31%。想玩細價仙輪，揀9907，但溢價高啲，短炒可以，最緊要快手快腳，以免溢價收縮輸錢。
章盛