深田恭子喺今個月初俾日本雜誌《Friday》刊出佢同搞笑演員有田哲平約會過夜嘅偷拍相，而噚日出版嘅《Friday》，又再偷拍到有田四圍滾嘅相，有田擺明車馬係借恭子嚟博宣傳。
據今期《Friday》報道，有田哲平日前俾狗仔隊發現佢同班豬朋狗友去𠝹女派對，有田搵到「獵物」之後，即刻帶個女仔搭的士到愛情酒店鬼混。點知佢搵咗三間酒店都全場爆滿，破壞咗佢嘅開房大計。
聽聞有田哲平呢個人不嬲都沙沙滾，佢家中已經有個同居女友，外形都有啲似恭子，不過，佢同恭子約會都只係玩玩吓，況且佢曾表示過希望畀人偷拍到佢同其他女星一齊嘅照片，顯然係有意利用深田恭子嚟宣傳。
雖然藝人借緋聞嚟增加知名度係無可厚非，但如果好似深田恭子咁，俾傳媒踢爆同有田哲平一齊過夜後，搞到主演嘅日劇收視率下降，就真係「賠了夫人又折兵」。恭子最近與嵐成員二宮和也合演日劇《縮水情人》，收視率每況愈下，相信恭子俾事務所大罵一場之餘，又要諗計挽回自己嘅形象同人氣嘞。