蔣怡（CoCo）與張文慈昨日齊往跑馬地，出席亞視節目《馬壇廣播新人王》大募集活動，身為名模的CoCo會為參賽者擔任形象及儀態指導，她說：「我唔識賭，但我就好鍾意馬，睇啲馬賽跑好靚。」
CoCo近日亦忙於訓練十二名準亞姐行catwalk，她說：「行catwalk唔係好難，但就好辛苦，因為我又冇正式上過堂，好難話畀佢哋聽點行，加上我啲廣東話又唔係咁好，所以比較困難。」
此外，張文慈自言對賽馬十分感興趣，她說：「雖然我對買馬有興趣，但只係小賭怡情，我試過落注幾百就贏咗幾千蚊。」張文慈曾與王晶合作任賽馬節目主持，她說：「聽聞若果女主持有月事應該避免出鏡，嗰時我只係做咗三個星期主持，可能緊張得滯，冇嚟到月事，所以冇乜嘢唔方便。」
採訪：王崇穎