話就話大陸搞宏觀調控，打擊好多紅籌國企股盈利，但年頭上市的濰柴動力（2338），股價獲大隻佬密密增持，由谷底反彈。
經紀黃話，濰柴業務唔受宏調影響，據講下周二公布的中期業績，又係靚到嚇大家一跳嗰種。
濰柴早前股價一度低見12.20元，但三扒兩撥就抽番上14元水平，噚日微升0.36%，收14.10元，成交股數102萬股，金額1449萬元。
經紀黃話，濰柴股價在低位時，頻頻見到上市保薦人之一的中信資本，掛牌密密吸納，跟住又見到一班美資基金出嚟接貨。濰柴獲得睇好，主因係佢哋生產嘅重型柴油機需求殷切，未來盈利增長仍然可觀。
另外，經紀陳前日品題嘅高風險股星采控股（559），在大市氣氛不利細價股的情況下，仍然開車炒上，噚日又升17%，收5.5仙，成交金額396萬元。
不過，經紀陳仍然維持原判，叫小初莫沾手，皆因隻股貨源甚疏，上車容易落車難。
慕容小初