何偉途東莞涉嫌嫖妓案，原來案中有案，深圳公安話，喺「百日掃黃」行動之中，重捉獲特區警察一名，即時判處十五日拘留。警員就算出示身份，口口聲聲嗌自己友，都冇情講！
警員北上嫖吓妓，都好正常，因為第日要喺砵蘭街掃黃，今日自不然要貼身掌握吓啲北姑嘅具體資料，了解吓佢哋嘅語言同生活作風，以便將來喺九龍執行嚴打時，會確保有冇拉錯人。拉何偉途，都重話係針對民主黨人員潛回祖國活動，防止佢哋嫖妓時向妓女灌輸民主思想，煽動佢哋早日推動東莞市市長一人一票普選啫，特區警員歸李明逵打理，李明逵歸保安局局長李少光領導，李少光係三司十一局之一嘅人員，歸阿董指揮，咁即是自己友，點解咁反面無情？
深圳公安咁樣做，可謂過晒火位，傷害咗香港紀律部隊嘅感情，而且可能招致報復。日後若然有深圳公安落嚟嫖妓，喺旺角遭到警方掃黃斷正，容乜易警方會報復，照樣將公安嘅玉照交由《蘋果》刊登，咁咪盞加強中港關係緊張？
係咪因為上次廣東省公安「七小福」非法入境活動，喺域多利道遭到本港警員截查身份後拘捕，搞到廣東方面冇晒面，於是落柯打下令以後掃黃點到香港警員相，一律殺無赦？若然係咁，就未免太過無情。廣東公安同香港警方份屬兄弟部門，港警北上叫雞，促進珠三角消費繁榮，北姑做多咗生意，收入多咗，就買多幾件名牌，廣東省政府理應對港警兄弟人員作出掩護，必要時重提供埋鐵竇服務㖭，點解反而會搞到咁？
雙方有一個「粵港合作督導委員會」，聽講喺陳方安生時代，遭受陳太諸多抵制，好嘞，陳太落咗台，粵港合作委員會係咪應該發揮吓功能？嘢嘢搞到你叫雞，我拉人，一件咁小嘅事都敵我不分，大家又點樣合作起港珠澳大橋？
李少光、李明逵不但冇強硬向公安交涉，冇乘勢要求加強粵港雙方執法人員叫雞活動嘅通報機制，重不斷磕頭話警員北上要守法，真係好令到公務員同香港人失望。
傳真︰2623-9278
電郵︰