前晚瑞典主場對荷蘭嘅國際友誼賽，主隊前鋒伊巴謙莫域就似乎唔係當友誼賽咁睇，非常好火氣，重連對方嘅阿積士球會隊友都冇面畀，照踢照撞可也。
比賽中荷蘭嘅尹達華特及希汀加，都先後被同為阿積士隊友嘅伊巴謙莫域踢親；當中又以前者傷得重啲，初步睇嚟起碼都要唞番個零禮拜。希汀加亦不能幸免，俾伊巴謙莫域撞到成個飛起；而喺伊巴謙莫域追成二比二入波後，更連前阿積士門將雲達沙都唔放過，望住對方狂吼，好似人哋欠咗佢咁！
阿積士呢個禮拜聯賽將會主場迎NAC，一般都認為係大炒格；但𠵱家主將尹達華特無喇喇俾自己友踢傷，想博上盤者要留意嘞。
意大利大小國腳前日齊敗陣，大國腳係就係試陣，但吞冰島雙蛋點講都係失威，而新帥納比係比亞索（八二世盃冠軍教練）後，廿幾年嚟首個首度領軍輸波嘅意國教頭。佢重強調以往領軍首戰失利，象徵輝煌戰績嘅開始喎。即管睇係佢為自己整下台階，定真係咁「玄」嘞。
真係估唔到，紐尼斯加盟咗英超利物浦後，呢位右中場唔知係咪開心得滯，竟然喺球隊第一課練習，扭傷左膝，重要係無其他球員同佢接觸嘅情況下，自己扭傷。賓尼迪斯知道事後都好突然，話今個星期聯賽唔使預佢，睇嚟佢原本想放走芬倫計劃，可能要擱置。
好多球會都有正式會歌，但原來億萬大軍車路士無自己會歌，貴為班主嘅阿巴莫域治決定攞一萬六千美金，搵人作新會歌同請俄羅斯流行女歌手演唱。當然，搵得俄羅斯歌手唱，首歌亦會以俄語為主。如果電視直播車路士賽事，我求大俠真係想睇吓班車路士球迷點嘅反應！
紐卡素中場戴亞最近傳因不滿領隊卜比笠臣安排而鬧翻，睇番周中英格蘭喺紐卡素主場對烏克蘭，後備上陣嘅戴亞，每次掂波都畀球迷柴台，就知佢已因此盡失球迷心。話晒卜比SIR食鹽多過你戴亞食米，求大俠勸戴亞都係乖乖聽話，如果唔係以後都幾難再喺「紐記」立足。