何偉途喺東莞涉嫌叫雞，連累咗民主黨嘅形象。為咗加強番民主黨嘅「專業、理性」形象，佢哋將會推出一套名為《立會群英》嘅網上宣傳片，為部份候選人宣傳。
有份創作嘅范國威同民主黨大腦羅致光話，佢哋係參考咗美國劇集《白宮群英》嘅拍攝手法，就連候選人嘅動作、眼神，都係參照住該劇嘅劇照，重有林子揚創作嘅《民主怎可擋》呢首歌當配樂。
佢哋重特登借李柱銘嘅大狀辦公室做片場，可能貪佢個辦公室有幾個書櫃嘅法律文獻，攞嚟做背景都可以拋吓人。
八方睇落都覺得似模似樣，CK話，成套片長約兩至三分鐘，投資額大概係兩皮，𠵱家已去到將近完工階段，相信好快就有得喺網上播放。
民主黨除咗拍片，由鄭家富排頭位嘅7.1連綫今日會向田北俊下戰書，請佢出席二十九號嘅擂台，解釋清楚佢點睇基層嘅權益，因為田少講過類似納多啲稅嘅人要照顧多啲嘅說話，當然田少未必應戰。
（圖）民主黨拍選舉宣傳片《立會群英》時，參考咗美國劇集《白宮群英》。
傳真︰2623-9278
電郵︰