喺深水埗經營多年嘅民協今年擴展版圖，馮檢基同廖成利分拆兩張名單參選，希望可平均配票連取兩席，兩人出盡辦法拉票，不過各方嘅民調都顯示民協嘅如意算盤打唔響，廖成利支持度至今未有起色，有九龍城街坊向八方報料，話近日廖成利嘅街板忽然少咗，重發現有老虎仔嘅街板俾基哥街板冚住晒，唔通民協已經「棄廖保馮」？街坊好肉緊咁同八方講，老虎仔一直落力拉票，話唔定可以急起直追，民協無理由咁快就放棄佢。
基哥則回應話純屬誤會，民協無諗過玩所謂「棄保效應」，又話可能係職員忙中有錯，將兩個人啲街板掛錯位置，「其實兩個都係民協候選人，掛錯位都唔會互相投訴啦。」
另一方面，民主黨涂謹申多塊掛喺石硤尾南山邨一帶嘅街板俾人刑毀，佢哋表示會報警，同時希望各界高抬貴手，事關掛過啲街板好麻煩。
傳真︰2623-9278
電郵︰