民建聯嘅蔡素玉都算命苦，有人就形容佢命硬，上次參選港島區直選，排喺程介南後面，阿程就出事；今次排喺馬力後面，馬力就病咗，蔡小姐就認為，兩次嘅情況有相同嘅地方，亦有不同之處。
佢話，唔同嘅係上次屬負面新聞，今次唔係，至於相同嘅就係兩次都咁辛苦。八方都覺得蔡小姐好嘢，民調點唔好都影響唔到佢，一於自我感覺良好，有嘢照做，信心繼續爆棚。
至於馬力嘅病況，蔡小姐話自己全不知情，一切要問葉國謙，自己就同馬力念經，希望佢早日康復。
咁原來葉國謙、曾鈺成同黃建源噚日上咗廣州醫院探馬力，醫院話馬力嘅手術好成功，目前康復進展良好，但仍要靜養一段時間，不宜接受探訪。八方都祝馬力早日康復，912投票前可以回港坐鎮。
（圖）葉國謙（右）同黃建源（左）以及曾鈺成（左二）着晒保護衣喺病床邊同馬力合照。
民建聯提供圖片
傳真︰2623-9278
電郵︰