個市交投繼續有限公司，前日74億元，昨日78億元。交投唔多，啲資金一郁手，個市隨時會有較大變化。恒指跌27點，皆因滙控（005）除息1.01元，呢個因素拉低恒指36點。
滙控C輪：滙控除息收117元，實際升1.4仙。滙控C輪冇息收，數據真真正正反映現實數字。滙控新買家冇股息收，股價可能會稍為呆滯，若有回軟，吼低位收集C輪，等下一回合滙控再升過之時收割。收集對象係邊啲，視乎個人搏殺格去到邊而定。賭性最重嘅，係9640，下月6日到期（最後買賣日期係本月31日，得番9日買賣），輪價18.7仙，負溢價0.1%，槓桿率62.6倍（有效亦係）。未來幾日，滙控假如跌2元，隻輪冇得剩，正股升2元，隻輪可升1倍。其次9876亦係搏殺格，但交投太疏，唔似得9640，呢頭上車嗰頭落車，幾分鐘已有賺蝕數可計。
想揸耐啲，唔想炒出炒入，揀2147，明年4月到期，輪價93仙，溢價3.7%，槓桿率12.6倍（有效12.4倍），引伸波幅21%。
升得急C輪：華晨（1114）升5%，C輪2112升30%，收7.9仙，年底到期，溢價55.4%，隻輪溢價太高，買唔過。
大唐（991）升2.8%，C輪9790升31%，收9.4仙，下月夠鐘，溢價17.8%，最後作廢多過唔會作廢。
華能（902）升3.7%，C輪9048升17%，收12仙，明年1月到期，睇吓溢價43%，就知道風險好大，最後會變成天津鴨梨，冇渣。
章盛