巴西因為呢個周中國際賽對海地時，卡卡、卡富、迪達、盧斯奧及薛羅拔圖等國腳，不獲AC米蘭及拜仁慕尼黑放行歸隊，巴西國家隊教練彭利拿決定「報復」；喺剛公布嘅下月世界盃外圍賽，主場對玻利維亞嘅名單之中，剔除咗以上五位國腳名字。
就咁睇，AC同拜仁都冇蝕底喎，佢哋五個咁咪可以更專心踢球會賽事囉？但其實彭利拿嘅口脗，係威脅緊佢哋嘅國家隊前途。
係人都知巴西國內外球員人才濟濟，冇咗以上五人亦唔會有大影響；反而佢哋若果想繼續穿上巴西件尊崇黃色戰衣比賽，就要同球會詐吓型嘞。
彭利拿呢招借刀殺人，搵球員去向嗰啲唔肯放人嘅球會施壓，都幾絕喎！
喺周三英格蘭主場對烏克蘭嘅友賽前一晚，例牌由兩國二十一歲以下國家隊打番場先，結果英格蘭班小國腳就贏咗三比一。值得一提今仗梅開二度嘅維拉前鋒C高爾，呢位後生仔季前備受各界睇好，上周英超聯開季首戰亦入一粒，照咁睇嚟；上位之日不遠，大家要昅實佢嘞。
國足小將董方卓所效力嘅安特衛普雖然降班，但董方卓嘅一舉一動，仍然好受國內傳媒關注。好似近日佢就喺場比利時盃比賽中，後備上陣冇耐即刻有波入，幫球隊大勝艾德赫姆五比一，賽後安特衛普官方網站點名讚董方卓表現好。我求大俠希望呢位國足新希望繼續有進步。
我求大俠早兩日提過，無記播奧運男足麗音評述失色；唔知有關方面係咪聽到我講，肯正視呢個問題，所以前晚阿根廷對澳洲場波，就搵番資歷甚深嘅武官出嚟評述，波友應該收貨。無記播奧運頭兩日劣評如潮，唔少地方逐步改善。只要繼續從善如流，咁就大家happy啦。
最近出版嘅曼聯官方雜誌，公布歷來曼聯最偉大球星選舉嘅結果，上一次（三年前選）排第一位嘅簡東拿地位不變，仍然係球迷至愛。最大變動係萬人迷碧咸由上一次排第三位，跌至十大不入，排到十一。好明顯碧咸離隊後，響曼聯球迷心目中嘅地位的確愈嚟愈低。