張曼玉（Maggie）喺香港接受傳媒訪問時，唔多肯講感情事，但最近佢接受法國雜誌訪問，就直認自己喺精神上喜歡過女性，不過從未同女人發生過性關係。
Maggie又強調𠵱家自己係一個徹底嘅異性戀者，同時佢又話：「我係一個幾敏感同容易受傷害嘅女人，所以我好鍾意喊，但今日我已經唔會咁，我諗係男朋友改變咗我，我男朋友係一個好人。」
對於佢喺葡萄牙睇歐洲國家盃時，俾香港雜誌影到同男友喺酒店泳池邊嬉水時當眾除bra嘅相，Maggie冇深入講呢件事，只輕描淡寫咁話：「我同香港媒體之間已經存在太多問題。」馮仁昭聽Maggie啲朋友講，Maggie幾鍾意喺香港生活，但每次返嚟俾狗仔隊死纏，令佢都幾煩厭！
林志玲噚日一身白色低胸吊帶裙，喺台灣出席由佢做代言人嘅鑽石產品活動，重展現難得一見嘅舞姿，短短三十分鐘，除咗輕鬆賺代言人嘅酬勞外，重獲贈價值約三十七萬新台幣（約八萬五千港元）嘅鑽鏈。難怪林志玲喺活動上咁風騷兼四萬咁口啦！
噚日本報報道咗EMI要收購華納、陳奕迅有機會臨門一腳唔簽華納後，華納高層陳志光噚日打電話畀馮仁昭，佢話：「我問過公司呢件事，佢哋話直至呢刻都未聽過收購或合併嘅事。如果有咁大件事，大中華區都應該會收到消息，冇理由一啲風聲都冇，而且我哋大中華區進行緊收購計劃，好快有公布，至於傾陳奕迅嘅合約事就進行順利。」
關心妍（Jade）噚日接受商台節目訪問，提到啱啱推出嘅精選大碟，阿Jade話知道第一批定單已經過萬張後，自己都鬆一口氣。講開自從上隻碟，公司冇再租紅隧口嘅宣傳位置，阿Jade話：「𠵱家市道差，希望新碟銷量好，下次出碟先再租囉。」馮仁昭都覺得𠵱家嘅唱片市道好唔掂，難怪啲歌手有過萬張定單已經開心到飛起。
台灣藝人林心如噚日着住黑色低胸裝，喺北京出席人民大會堂舉行嘅愛博爾羽絨服嘅記者會。
近排升cup成功嘅林心如獲邀請成為呢個品牌嘅代言人，噚日雖然天氣炎熱，但仍然舉行簽約儀式。
今年林心如又做纖體代言人又做羽絨服代言人，認真豬籠入水！
