恒基地產熱賣新盤西灣河嘉亨灣，雖然已經做咗兩輪大型內購，不過，仍然有唔少買家，對呢個盤有興趣，一、二手都繼續有成交。
香港置業葉明輝話，一個投資者剛剛沽出兩個五座中層G單位，每個六百七十三方呎，各以三百五十五萬元成交。呢兩件貨，喺短短兩個禮拜，升值大約百分之十五，個投資者夾埋賺咗成百萬元。
一手單位亦都唔輸蝕，一樣有買家垂青，利嘉閣張碧華透露，一名內地商人，剛剛購入嘉亨灣兩房單位，六座極高層F室，面積六百七十四方呎，成交價係四百六十五萬元，每方呎近六千九百元。聽講，買家經常穿梭中港兩地，都未諗掂自住定係收租。
西九龍文娛藝術區，六月截標，近日突然盛傳，今個禮拜有公布，講邊啲建議書唔合格，要「出局」。
蘭西問番政府，負責官員即時否認今個禮拜有公布，重話佢哋𠵱家淨係睇文件，已經好唔得閒，重估可能係發展商放風，想迫政府做嘢。
西九共收五份標書，信和、九倉、華置與嘉華財團，設計蜻蜓翼天幕群；太古以樹林做綠色天幕；恒地喺天篷加個全球最高水柱地標；長實與新地會用政府選出嘅得獎設計。
政府講過，明年將所有合要求嘅建議書，公開展覽，收集公眾意見後，選出中標財團。若果剔除唔合資格嘅建議書，會唔會係第五份背景不明嘅標書。
新地旗艦商場apm，噚日又有新搞作，喺觀塘創紀之城一期，舉行以不同時代為主題嘅時裝表演，一眾名模如Rosemary、徐子淇等演出。
個場六十三萬呎，出年初啟業，新地馮秀炎話，已租出八成半，底租每呎八十至二百，若租戶營業額超出特定水平，新地會以提成方式，收取較底租為高的額業額百分比，時裝業為十二至十五巴仙，飲食業為八至二十巴仙，化妝品則是七至二十巴仙。
新地為宣傳apm品牌，將創辦免費雜誌apm:agazine。
舖市出現罕見換貨成交，上周傳出兆安地產李太以一億二千八，向羅太購入銅鑼灣英皇鐘錶舖，交易原來重有下文，羅太同時以億二，向李太購入怡和街肯德基家鄉雞舖址，可謂雙贏，羅太兩年獲利近六成半，李太五年勁賺一倍三。
經手代理中原鄭琪俊話，今次交易買賣雙方都有着數，釐印費慳番唔少，根據法例，只須付兩單交易差額八百萬嘅三點七五巴仙，約三十萬，正常億二成交要畀四百幾萬。
不過，測量師彭兆基認為，呢兩單交易背後有特殊原因，成交價冇參考價值。
世仇貓狗相遇，竟然唔打大交，因為係俄羅斯「HouseCats&Dogs」馬戲團嘅表演主角。呢個馬戲團，係恒基將軍澳新都城中心商場活動節目之一。
馬戲團第五代掌舵人丹尼，帶住四隻狗、一隻貓，曾經喺美國五十幾個州表演。
另外，恒基今日喺商場介紹同MCL將軍澳戲院聯合舉辦嘅活動詳情，恒基租務市場拓展部副總經理薛伯榮會出席，可見公司幾咁重視呢個商場。
蘭西
電郵地址：
