早前獲多間證券行唱好的富豪酒店（078）又有新搞作，就係委任玩具大王做副主席。雖然小初唔明玩具同酒店之間有乜嘢協同作用，但多位有錢人加入董事會，對富豪酒店嚟講係一件好事，起碼投資者信心都大啲。
不過，富豪近期走勢奇怪，股價往往升1日後又回落1日，始終在現水平浮浮沉沉。小初有啲唔明，酒店股受惠於自由行，富豪獲證券行唱好。此外，赤柱富豪海灣好賣，令帳目可能作出回撥。經紀黃話，據講可能係富豪以往發行大量可換股票據作為償債，每當股價有異動，票據持有人即刻換股沽貨所致。
如果真係好似經紀黃話咁講，始終會對富豪股價走勢有一定影響，家陣有玩具大王呢位大隻佬加入，希望情況有所改變啦。
另外，近排股價走勢甚為肉酸的生命科技（1180），昨日突然回勇，勁升17.2%，收7.5仙，成交股數5839萬股，金額416萬元。但經紀陳叫小初莫沾手，因為唔排除升勢只係一閃而過。
慕容小初