香港近年最空氣污濁嘅一日，政局亦俾東莞嘅公安搞到烏煙瘴氣！九龍東民主黨候選人何偉途涉嫌在東莞叫雞，失手被擒，毋須審判，亦冇得上訴，就咁俾公安「收容勞教」六個月！
何太接受本地傳媒採訪，哭成淚人，個老公係唔係同人赤裸上床，都唔理咯，最緊要係個人平平安安返落嚟。咁又係，喺大陸叫雞，就算俾公安抓獲，最多都只不過係即場罰款，冇強姦，個女人又唔係未夠十六歲，有乜理由審都唔使審就「收容勞教」？根據邊條法律？香港並無「收容勞教」呢條例，加上「犯法」地點並非本港，又係在司法公正權富爭議性嘅鄰近地區，所以特區政府應該冇權取消何偉途參選資格，不僅係咁，律政司司長梁愛詩、保安局局長李少光，乃至特首阿董，都有義務向中方交涉要求胡溫放人。
日本遊客揀正九一八喺珠海酒店尋春，被公安捉獲，都唔使收容勞教，點解何偉途就好似喺個大海游水，獨係佢俾條鯊魚嗒到應？因為佢係民主黨候選人，政治動機明顯。若然佢係「愛國」，咁就算喺東莞起雙飛都冇事，香港唔知每日有幾多貨櫃車司機過皇崗搞嘢，若然個個都要收容勞改，香港重邊有咁多物流？啲拖頭同貨櫃車公司執晒笠都似。
何偉途本人亦都有責任！民主黨一早呼籲唔好上大陸，係都唔聽，即時斷正。各方面消息話叫民主黨要「保持低調」，怕講多兩句，刺激到中方更加冇理性，由收容勞教六個月改為判刑正式勞改三年。唔怪得連國際人權組織都出聲，提醒阿胡溫，中國經已簽署聯合國人權公約，不過咁講都有啲多餘，中國夠簽署咗基本法同中英聯合聲明，最終解釋權咪一樣喺北京。總之呢單嘢係何偉途錯，佢錯在太過唔了解祖國，正所謂經一事長一智，落番嚟唔好再曳曳，沖涼揼骨去泰國好過嘞。
傳真︰2623-9278
電郵︰