油價居高不下，美股反彈力度有限，港股繼續迷失方向。恒指全日波幅僅75點，收市報12228，微跌27點，成交得78億元。好彩國企識反彈，國企指數回升56點，重返4000點之上，其中汽車股表現尤其出色。
中國推出宏調，令第二季的新車銷路下跌，售價回落，但踏入第3季，情況已有好轉，中國人民銀行同銀監會前日又公布《汽車貸款管理辦法》，目的係要規範同加強管理，以促進汽車消費市場持續健康發展。新例規定內地私家車貸款最多可達車價8成，預期將可刺激買家的意欲，汽車股受消息刺激，全面回升，以華晨中國（1114）同駿威汽車（203）的追捧較為活躍，分別上升5%同4.5%。
汽車雖非中國定性為過熱行業，但宏調導致汽車貸款收緊，影響企業大幅減少汽車的消費，現時中央推出新貸款法則，將可對促進內銷起到積極作用。今年第4季，3大外國汽車製造商將可染指汽車貸款業務，亦可刺激銷售。
汽車銷售經過連續4個月的大跌後（由今年3月的按年升幅59%一路跌至6月的5%），上月止跌回升，轎車總銷量突破17萬輛，比6月的16.5萬輛為多，係連跌3個月以來首次回升。
另外，7月全國汽車產銷分別完成35.41萬輛及34.6萬輛，產銷率97.71%，亦比6月有所增長。
今年上半年新車銷售疲弱，汽車股中期業績下跌，亦早已在市場預期之內，就以華晨為例，其股價由今年初最高的4.85元，一路下跌，到近日的1.53元才回升，跌幅足足68%！
下半年汽車銷售可望回升，全年盈利預期仍會有增長，現時個別汽車股價跌得過殘，日後亦會有好急嘅反彈。
華晨噚日收1.66元，升8仙，往績PE6.9倍，預期04年（12月年結）PE亦只係6至7倍，係最具條件可大幅反彈的汽車股。華晨連跌8個月，今次反彈，起碼可維持一兩個月時間，即使以回升跌幅的0.382計，股價已可重上2.8元！
華晨由低位回升，技術指標向好，MACD同STC都出現入貨訊號；另外，在8月2日有一個下跌裂口（1.87元至1.94元），相信好快可以補回。
郭兆誠