「玩具大王」蔡志明近年在港狂掃物業，又收購酒店，雖然縱橫商場，但佢噚日先至首次成為上市公司副主席。蔡志明同八方講，其實之前已經有兩間上市公司邀請過佢加入董事局，但佢做慣實業，對於靠「炒」嘅公司，興趣不大。佢重同八方講，自己喺美國係兩間上市公司嘅董事，至於私人業務就冇諗過上市，「十年前有會計師鼓勵我上市，但我想慳番啲時間做生意」。
八方諗起蔡志明之前有唔少位元堂股份，唔知位元堂有冇搵佢入局呢？蔡志明唔肯講邊間上市公司搵過佢，但就話一直冇諗過加入位元堂做董事，𠵱家更係一股位元堂都沽清。
除咗蔡志明獲富豪酒店委任為副主席，羅旭瑞嘅千金羅寶文亦被委任做執行董事，呢位太子女今年只係二十四歲，將會主力做推廣同銷售嘅工作，羅寶文可以話係天才兒童，佢十五歲就入大學，十九歲就畢業，重係年年攞獎學金嗰隻㖭。
（圖）蔡志明（右）加入富豪酒店，與羅旭瑞（中）及羅寶文一齊飲杯。
傳真︰2623-9278
電郵︰