由市原隼人同石原佐美等一班日本年輕人氣偶像主演嘅日劇《水着少年2》，唔經唔覺喺日本播到第七集，收視重爆晒燈㖭。早前日本富士電視台就特別為呢套劇推出咗一系列嘅產品，造型得意之餘又夠實用，真係睇到我羅拉心郁郁好想買。
《水着少年2》講述由市原隼人飾演嘅主角水山鳥泳吉，同一班男子高中生為咗組成一隊男子韻律泳隊而奮鬥嘅故事，劇中呢班水着仔經常着住套運動衫褲四圍走。日本富士電視台特別搵嚟游泳品牌arena合作，推出咗同劇中水着仔所着一模一樣嘅運動衫褲同T恤，就連泳帽都有，真係夠晒心思。
除此之外，佢哋重設計咗一系列文具包括筆記簿、貼紙、文件夾同原子筆等等，上面全部印咗cute到爆嘅水着仔嘜頭，我係學生都實行買番set嚟開學用啦！
家陣天氣咁鬼熱，一出街就周身汗，所以梗係要帶埋呢條毛巾仔出街抹汗啦！如果用埋嗰把咁抵死嘅紙扇撥涼嘅話，就算係三十八度出街都唔怕喇！咁多種產品入面，我羅拉最鍾意嘅始終係呢個公仔鎖匙扣，水着仔造型不單止夠cute，重好鬼搶眼，女仔見到一定冧晒！