李彩樺（Rain）現為收身公司減肥堂的代言人，早前她發現被人冒其簽名，購下一份賠償額約七十八萬港元的意外保險，受益人卻是減肥堂，故昨日李彩樺往尖沙嘴警署報案求助。
李彩樺昨日往尖沙嘴警署報案，事件涉及她懷疑被人冒簽購買一份賠償額達十萬美元（約七十八萬港元）的意外及醫療保險，故阿Rain決定報案求助。
保險單寄公司地址
阿Rain現仍為減肥堂其中一位代言人，昨日她在報案後接受本報電話訪問，透露自己早於去年年尾已發現被人冒簽名買保險，而受益人竟為減肥堂，故阿Rain得悉後極度震驚。
阿Rain昨日在電話中，詳述了事件始末，她說：「我今日去咗尖沙嘴報警，係因為自己發現咗有人冒我簽名買保險，受益人係寫減肥堂。舊年我整親腳，去睇醫生後claim保險，之後就好奇怪，點解等咗好耐都收唔到錢，保險經紀就話已經寄咗畀我，後尾我至知原來啲保險單唔係寄去我屋企，係寄咗去減肥堂嘅地址，咁我就上咗去保險公司check，至查到自己有多一個保險戶口，唔知邊個同我買咗一份意外保險，金額我就唔係太記得啦。」
阿Rain表示自己一向為該保險公司的客戶，但負責該份被冒簽名保險單的卻是另一名經紀。
減肥堂稱未聞此事
而阿Rain暫時未有任何金錢上的損失，她說：「嗰份單係用減肥堂嘅公司戶口畀錢，用晒公司蓋印。但份單真係好離譜，竟然寫咗我個藝名，我真名係用『華』字，冇木字邊㗎，但張單都係照寫李彩樺，負責個經紀如果同人串埋嘅話，我諗佢都有好大問題。」
阿Rain聲稱自己曾向減肥堂查詢此事，但對方卻沒有回應，由於事態嚴重，故她才報警求助。阿Rain說：「我問過減肥堂嗰邊，但一路冇回應，而我又忙拍劇，到近排有時間，我就決定去解決呢件事，循法律途徑去處理。我覺得呢件事好嚴重，好驚㗎，有人冒認我買保險，我點知佢究竟同幾多間保險公司買咗呢啲保險呀？」
減肥堂負責人Janice昨日在電話中回應此事說：「冇可能，我完全唔知呢件事。」記者指阿Rain表示曾經向減肥堂查詢過此事，Janice說：「佢從來冇同我講過呢件事，我都唔知發生乜嘢事，係你打畀我我先知。等我同佢了解吓先，我唔想講咁多嘢住，費事愈描愈黑。」Janice透露李彩樺仍然是減肥堂的代言人，不過對方報警之前並沒有與公司溝通過。
雙方簽署才能生效
阿Rain得悉減肥堂否認此事後，昨晚她補充說：「我已經畀晒張單嘅影印本同資料警方，就等警方去處理啦。」問她會否擔心因而影響與減肥堂的合作關係？阿Rain說：「我一路同佢哋都冇乜直接接觸，都交畀警方搞咯，我唔會主動聯絡佢哋，反而係睇佢哋會唔會主動聯絡我。」
對於阿Rain被冒簽名購買保險一事，據保險界業內人士指出，僱主為保障權益，確可為僱員代買保險，但這必須視乎雙方所簽定合約內是否有註明可保權益的法律關係及須雙方簽署同意下才生效，而冒簽名固然無效，但過往在保險界內，類似事件亦屢見不鮮。
採訪：朱倬誼、張止寒
