兩大國際唱片公司EMI同華納好耐之前傾過合併嘅事，但一直未成事，不過最近呢兩間唱片公司嘅巨頭再傾，雙方都有合併嘅意思，如果一切順利，出年四月就可以成事。
馮仁昭聽聞合併後，將會由EMI做主導，係咁嘅話，香港嘅華納唱片會有好大影響，因為EMI𠵱家唔做中文唱片，交晒畀黃柏高嘅金牌公司負責，而金牌只會幫簽咗佢哋經理人合約嘅歌星出碟，咁搞法，將來華納真係畀EMI做主導嘅話，華納肯定好多歌星要另搵出路。
華納旗下嘅鄭秀文（Sammi）已肯定會去東亞唱片；至於梁詠琪（GiGi）啱啱續約冇幾耐，所以唔知合併後，對佢喺華納嘅發展會有幾大影響；而即將簽約華納嘅陳奕迅（Eason），佢經理人陳家瑛唔知係咪收到風，埋門一腳竟然去咗搵環球傾過檔，所以Eason分分鐘唔簽華納。
台灣歌手蔡依林日前喺上海開演唱會時，着咗件低胸裝谷胸，據知蔡依林有咁凸出嘅效果，全因為設計師幫佢設計咗神奇小背心，周杰倫前緋聞女友溫嵐噚日試着呢件神奇小背心，都即時有波濤洶湧嘅效果，我馮仁昭都睇到眼定定。而蔡依林為咗豐胸，重日日搽油按摩㖭！
鄭希怡（Yumiko）噚日去商台接受訪問時，好高興咁話終於考到車牌，佢話：「考泊位我只係補咗一堂，我將部車揸返試場之後，個考牌官同我講：『你揸車都幾恐怖！』我唔鍾意二手車，想出部平治SLK跑車。我就嚟生日，爹哋畀咗六位數字我買車，今個月我有四個『新』，新車牌、新樓、新唱片同新車，真係豐收！」
許志安第一次做奧運主持，點知就出事，佢本身都係人哋偶像，應該知道fans有幾瘋狂，好衰唔衰話中國國寶姚明個樣兇殘，網友即刻狂鬧佢低B。噚日安仔返電視城時話：「我有講姚明係國寶，我意思係話佢cool，不過我明白點解fans會咁唔開心，如果係咁我衷心講句對唔住。」而無綫高層陳志雲就話接到咁多觀眾嘅意見，會從善如流喎！
鄭裕玲（嘟嘟）噚日返將軍澳電視廣播城訪問邵逸夫（六叔）同方逸華，嘟嘟話下個月會喺灣仔會展擔任「第一屆邵逸夫獎頒獎禮」主持，佢話：「當日以英文為主，當然要搵兩個有份量嘅主持，我知道特首董建華都會出席。」嘟嘟同無綫就嚟滿約，咁佢會唔會要求加人工？佢話：「都就快俾人炒啦，不過續約唔係錢嘅問題，我想做啲有質素嘅節目。」
