白鴿黨議員何偉途同佢老婆哭訴佢係東莞俾大陸公安屈，原來身居政協副主席要職嘅霍英東落到南沙開發，都一樣被番禺啲地方幹部玩到翻轉，差啲被人趕走，你話幾慘情。
八方呢兩日睇《信報》連載，由霍英東基金會嘅顧問何銘思執筆，講番當年佢哋開發南沙嘅苦況，真係可歌可泣，原來九三年做過南沙開發區第一任書記，後來升至番禺政協主席嘅梁柏楠最近涉經濟犯罪被捕，揭發佢多宗貪污，何銘思先至憤然站出來為霍老抱不平。
據何銘思講，呢位梁主席同黨羽都非常厲害，不但目中冇人，而且阻得就阻，貪得就貪，煩得就煩，「手握半丁點小權力，就可以搞到你雞毛鴨血」，好似霍老喺南沙搞個東發碼頭，啲地方官就迫霍英東攞二千萬喺旁邊起個南偉碼頭；南沙搞直航香港飛船碼頭、高爾夫球場以及天后宮，佢哋都照辦煮碗搞一個，明拆人牆腳之餘，重喺工程上開天殺價，搞到從不發脾氣嘅霍英東都咬牙切齒問佢哋，「係咪想趕我走」，可見做國家領導喺祖國都未必有着數。
傳真︰2623-9278
電郵︰