經紀黃早排強力推介的建滔化工（148），中期業績果然對辦，股東應佔溢利有成5.46億元，比舊年勁升192.3%，捧開場的外資證券行，見完公司管理層後發表報告唱好，繼續支持建滔。
建滔噚日股價升2.18%，收14.05元，成交股數165萬股，金額2318萬元，計落唔多夠刺激，業績咁靚都吸引唔到芬佬，實在令小初感到難明。
經紀黃話，皆因今時唔同往日，早兩年芬佬熱炒工業股的潮流已經過咗，個別芬佬更加轉軚，趁好消息沽出優質工業股換馬。基於呢個原因，就算部份工業股業績表現唔錯，但已經再冇以前咁好鑊氣。
另外，冷門仙股星采控股（559）獲榮盛科技（1166）注入銅業資產換取大股東地位的交易完成後，星采開始見到有異動，噚日升10.8%，收4.1仙，但成交唔大，只係成交咗260萬股，金額10.59萬大元。
經紀陳話，人哋咁大動作買隻殼返嚟，唔會冇後着，但現時咁嘅市況，根本唔適宜開車，不妨耐心稍等。
慕容小初