由籮霸珍妮花洛庇絲（JenniferLopez）同李察基爾（RichardGere）合演、改編自日本電影《談談情跳跳舞》嘅新片《ShallWeDance?》，十月就會喺美國上映。套戲嘅一批劇照啱啱喺網上曝光，睇嚟籮霸跳起社交舞上嚟又真係有板有眼。
今次《ShallWeDance?》嘅劇情係講述飾演已婚專業人士嘅李察基爾，對飾演社交舞教師嘅籮霸一見鍾情，佢諗住親近籮霸而走去學社交舞，其間伸延出一個浪漫嘅故事。由於套戲有好多戲份係描寫籮霸跳舞時嘅舞姿幾咁迷人，所以連籮霸都話自己為咗應付連串嘅跳舞鏡頭，練舞都練到腳都跛，好彩佢都好滿意自己嘅表現。一向係票房毒藥嘅佢，能否靠呢套戲嚟救番自己嘅事業，就真係有待揭盅嘞。
另外，籮霸自從嫁咗畀拉丁歌手MarcAnthony後，成個幸福少婦咁，不過有傳聞話籮霸嘅媽咪似乎唔多鍾意個新女婿喎。日前有人喺洛杉磯賭場度見到伯母，據講伯母兩杯到肚後大爆自己好唔鍾意Marc，因為平時籮霸事無大小都會搵佢傾訴，𠵱家阿女眼中只有老公。伯母重話好想籮霸舊愛班亞弗力（BenAffleck）做佢女婿㖭！