蔡子強本《新君王論Ⅰ》甚為暢銷，於是再斬二両，推出《新君王論Ⅱ》，聽講亦賣得唔錯。左丁山有啲跌眼鏡，估唔到香港讀者會對政治手腕、政治名人語錄、外國政治家嘅公關技術，都會覺得有興趣。呢啲書，自己都識寫啦，不過如果自己跟風，變咗食人口水尾，制唔過。
日日報紙新聞都有題材畀蔡子強寫第三本「新君王論」，譬如八月十二日美國新澤西州長JamesMcGreevey，四十七歲、哥倫比亞大學畢業、哈佛教育碩士、喬治城大學法律學院畢業，召開記者招待會，自我引爆一單轟動「性醜聞」，就係佢有婚外情，情人係男子漢！並且向全國宣布：IamagayAmerican，之後話明十一月就會辭職。如果佢即時辭職，州長空缺要補選，拖到十一月大選過後，佢就可以交棒畀番同係民主黨嘅接班人。
辭職日期、自動踢爆，都係經過一番計算嘅，如果新澤西州選民同情佢，話唔定幾年後又試東山復出，再競選過。呢啲處理危機招式、公關技巧，大家真係要研究學習。
現在知道呢位男士係以色列人GolanCipel，事情曝光後，佢指稱自己唔係同性戀，但因為州長喺○一年十一月當選後，請咗佢做下屬，年薪十一萬美元，故此受到州長性騷擾都唔敢出聲。州政府立即放風，話州長受到威脅，要求賠償五千萬美元，後來講價講到五百萬，最後州長自行公開此事，作個了斷。
自動踢爆，是否對付「性醜聞」嘅最佳方法？如果州長情人係女人，唔係男人，佢會唔會辭職？唉，美國好，香港好，男人凡係只要有啲名氣，唔聽話嘅，隨時有可能俾人跟蹤揭秘。你話好唔好學新澤西州長咁呢？考起。