參選九龍東嘅何偉途俾公安話佢叫雞被捕，搞到民主黨陣營立立亂。民主派候選人裏面，唔少人都會返吓大陸，好似大狀湯家驊同單仲偕，兩人都話怕怕，湯狀以前成日返大陸打golf，見到何偉途搞到咁大鑊，佢都話唔會再去咯！
湯狀噚日出席新東論壇，之後同八方傾起叫雞事件，佢話大陸啲小姐好猖狂，兩三年前佢同老婆喺深圳行街，突然間有個女人拉住佢隻手，嚇咗佢一跳，至於何偉途喺咪俾中央抹黑，佢就記起參選前鄭大班提醒過佢：「今次選舉嘅抹黑陸續有來，記住如果有啲靚女走埋你度，記住遠離啲，唔好搭同一架lift！」
「何偉途事件」對民主派一定有影響，不過大狀梁家傑就算好彩，原本梁狀諗住同民主黨組一張名單，但最終組唔成隊，反而令梁狀避過一劫，所以話，塞翁失馬，焉知非福。
長毛認為何偉途唔會咁笨，喺選舉期間返大陸叫雞，理由就係：「如果你咁急色嘅人，係咪急到要喺選舉期間返大陸嫖？香港冇得嫖咩？澳門冇得嫖咩？」長毛又大罵共產黨手段非常污糟，為咗抹黑乜事都做得出，佢同八方講：「如果遲啲有人話我收波纜、涉嫌桃色同打人，大家千祈唔好信！」
（圖）湯家驊有排都唔敢上大陸打高球。
傳真︰2623-9278
電郵︰