隔晚美股急升，港股只係跟得些少，恒指進帳唔夠40點。暫時人心都係未定，股價一高啲即有貨源推出。等埋明日長實（001）與和黃（013）派中期成績表，大市或者會稍為明朗化。油價若果忽然一跌，則一天都光晒，呢個可能性唔係話冇，不過可能要等一段日子。
中銀C輪：中銀（2388）明日派中期成績表，早前人事嘅嘢已擺低，市場估佢盤數唔錯，昨日股價升20仙，收12.85元，成為最養眼嘅指數成份股之一。
中銀C輪好多件，講數據，9180與9168好靚，衰在非常難買賣。9180喺12月到期，輪價9.3仙，溢價得2.2%，槓桿率13.8倍（有效8.9倍），引伸波幅24%。9168明年2月夠鐘，輪價15.9仙，溢價1.9%，槓桿率8.1倍（有效6倍），引伸波幅25%。兩隻輪每日成交，1個散戶分分鐘捧起晒。炒上炒落，揀9981可也，隻輪明年3月到期，輪價9.5仙，溢價8.6%，槓桿率13.5倍（有效6.8倍），引伸波幅29%。
國泰C輪：國泰（293）亦係是日藍籌中醒神一員，收12.75元，有20仙進帳。油價高企，但每桶價格有12美元以上風險溢價，未必能長期如此，一旦回落，國泰股價就有機會彈番上去。
國泰C輪吼9170同9865。9170年底到期，輪價10.5仙，溢價6.3%，槓桿率12.1倍（有效6.8倍），引伸波幅33%。9865壽命短啲，10月到期，輪價27仙，負溢價1.3%，槓桿率4.7倍（有效4.6倍），引伸波幅38%。
章盛