樓市氣氛好轉，筍盤特別多人爭，中原分行經理黃冠瑋話，大角嘴港灣豪庭，近排有個開價較低嘅單位，引嚟三個買家爭奪，結果成交價仍然低過市價八個巴仙。
單位係第五座低層H，近五百呎，以一百四十八萬成交，每呎近三千。黃冠瑋話，呢類單位一般都可以賣到百六萬，所以都係筍價成交。原業主一心諗住換樓，放盤時開價已經比較低，只係開百五萬，比起其他同類單位開價要百七萬，自然較筍，於是吸引到三個買家出價。
雖然多人爭，但還價就唔算特別進取，黃冠瑋話，𠵱家個成交價，已經係三個準買家中，出價最高。原業主去年底，以一百三十一萬買入，雖然未到開價就賣，都賺到十七萬。
港人內地置業，首選深圳，故當地樓盤一向幾好賣。百仕達控股嘅「百仕達。東郡」，五月開賣至今，已經套現四億人民幣。
發展商過去嘅禮拜日，推出全新第七及八座，兼開放示範單位，吸引幾百個買家查詢，包括自住同投資。
推出嘅單位，四百九至千餘呎，呎價八百，首日售出三十多伙。
深圳中原外銷策劃中心經理黃珊珊話，該盤租務市道幾活躍，回報有八至十厘。
長江實業北京東方廣場，最後一幢服務式住宅滙賢豪庭，首批一百伙未推出已經全部獲承租，𠵱家計劃加推七十個招租。
呢項物業共有逾三百五個單位，面積二百五至二千七呎（連二千呎平台），月租都唔平㗎，最平九千四，最貴一間月租一萬美金，即係港紙七萬八，計落呎租應該要二十九蚊。
「訴訟樓王」盈利大廈，一次過湧現十一個銀主盤，今日由卓先拍賣，開價九十六萬至一百零一萬，每呎二千一，其中六個連租約。
黃大仙飛鳳街盈利大廈，發展商盈邦96年「食多家茶禮」，以重建後的住宅作抵押，同時向多間銀行借貸，後來貸款遭律師樓盜用，發展商未還款卻把地盤轉售予招商局，結果引致連番訴訟。
今批貨由億茂財務持有，卓先負責人話，訴訟已告一段落，樓契業權沒有問題，但曾因欠交管理費被釘契，買家須使幾千蚊畀委託律師「解釘」。
該廈只得百餘伙，四五十伙現為或將成為銀主盤，早年以二百餘萬買入嘅，全部淪為負資產業主，絕無「盈利」可言。
蘭西
電郵地址：
