選舉未開波，民主派九龍東候選人何偉途，經已墮入越位陷阱！我國廣東省東莞市公安部刑警同志莊嚴宣布，何偉途喺東莞「嫖妓」，遭公安撞門雙雙赤裸抓獲在床，經查明有金錢交易，因此即行判決拘留六個月！
公安召開記者會，公布罪證！由表面證供睇，何偉途真係幾難甩身。共產黨對於思想入罪，可以隨時亂屈，不過講到叫雞風化等案，好多人就話有唔同睇法，可惜法例唔准，否則民主黨應該嗱嗱聲搵人補番個位好過！
話時話，民主黨早有黨令，叫啲黨員選前唔好入大陸。何偉途唔聽，係都要北上，結果俾人捉到應。若然佢真係叫雞，咁就罪無可恕，選舉期咁敏感，少少嘢忍吓都唔得，第日又點樣做議員。係包二奶或者私會舊情人，佢今年幾多歲？唔通愛情真係咁偉大？
本來喺大陸叫雞，好多人都斷過，多數係即時罰款三五千，或者通知老婆上嚟領人。不過東莞公安話今次撞正所謂「百日掃黃」，你唔好彩，惟有「從快、從重、從嚴」，喺上便歎完六個月落番嚟，即係唔使選。民主黨條飛，俾佢累一累，即是變咗大班同陶君行嗰條隊得益，東莞公安無形中有少少係幫大班助選。
照咁睇，民主黨人冇回鄉證好過有，國家對佢哋原來係一片苦心。例如華叔咁，七十歲重單身，中共畀張回鄉證佢，上到深圳，唐三藏都會打爛齋缽。唔怪得李華明冇做到咩嘢，咁都冇回鄉證，唔通國家覺得佢個樣有少少鹹濕，揸證北上會出事？為咗及時作出挽救，兼維護家庭和諧，及早沒收回鄉證，反而係幫咗民主黨人㖭。
國家對馬丁、華叔、李華明等人咁好，民主黨係咪應該考慮吓點樣回報國家嘅好意呢？沒收回鄉證，起碼會得到全港婦女支持。
傳真︰2623-9278
電郵︰