有「股壇大廚」之稱嘅黃坤，蟄伏多年，去年十月及今年一月兩度買入大華國際嘅股份，揸咗兩成三股權，做咗第二大股東，之後大股東沽咗啲股份，黃坤就做咗大股東。不過，佢最近先做大華國際嘅主席，噚日重正式以主席身份，主持公司記者會公布未來拓展大計，不過，個記者會就似足傳銷公司推介會。
話說今年四月，大廚坤以大華嘅名義，用咗六千萬元買咗健能五成一股權，呢間健能，主要係產銷一種聲稱可治療各種痛症的高電位治療儀。
喺記者會上，有成百幾位嘉賓，大部份都係婦女同胞，至於台上除咗大廚坤，重有部高電位治療儀嘅發明者潘建業教授，同加拿大自然療法醫學博士王永漢，佢哋不斷推介部儀器有幾巴閉，又搵台下嘅嘉賓分享經驗，其中一位五十多歲嘅女士話，自己已經停經好耐，用咗部機八個月，居然嚟返經！佢重問台上潘教授會唔會有BB？八方聽聽吓，不期然諗起……
傳真︰2623-9278
電郵︰