雖然美股因油價回軟而大升，不過香港股市就悶到抽筋，全日成交唔夠74億元，恒指全日波幅約100點，在12220－12319上落，收報12256，升36點。
噚日比較有睇頭係利豐（494），隻股先前遭狂沽空，噚日則出現挾空倉，股價反彈4.3%，收9.75元，成交達1.34億元。利豐早前因為業績差過預期而被基金洗倉，但據講利豐中期業績咁差，係因為有一筆高達1億元定單延至7月才入帳，所以大家唔使睇得太淡，大摩仍然力挺利豐，叫客戶增持，目標價高達15.20元。
中石化（386）將於8月27日公布中期業績，公司早前預期盈利增幅超過50%，而旗下一間子公司揚子石化，中期盈利勁升近1.4倍至17億元人民幣，且預期下半年升勢持續。以此推算，石化業今年應該大豐收，中石化盈利可能有驚喜，最近由3.20元調整至2.75元，股價可能會借業績勁升炒上，不過要注意埃克森美孚可能出貨。
So-net宣布退出寬頻市場，據聞客戶會轉手畀電盈（008），可能令電盈無端端多咗6萬客戶。不過電盈股價噚日仍原地踏步，收報4.95元。城市電訊（1137）急升8.4%至1.93元；有線寬頻（1097）則跌2.8%，收報2.60元。
希慎（014）今日公布業績，噚日已見熱定身，股價升2.3%，收13.40元。以利福（1212）盈利表現咁強勁，身為銅纙灣大地主的希慎應該唔會差。不過唔少分析員話，今年希慎應該冇咁快可以加到租，自由行引發的加租效應，最快要在明年才反映在希慎身上，所以今年業績不宜過份憧憬。
阿虎