放假去旅行主要分兩款，一款係「抵」字行頭，早機去，晚機返，直入江門，玩足兩日。事前工夫要做得十足十，哪一間的旅行套餐最抵玩，酒店是否連早餐，最好送埋免費Spa就冇得頂。下榻酒店後涼都唔沖就通街逛，行到靜脈曲張仍不罷休，晚飯後繼續流連夜店，狂歌熱舞，就算只得泰文歌都照唱卡拉OK。翌晨校定鬧鐘晨早起床，酒店自助早餐大擦一番，然後繼續行街購物，夜裏繼續卡拉OK。幾日過去，一分鐘都冇嘥過，覺冇乜點瞓過，雙腿肌肉鍛煉得硬如鐵石，然後上機回程，咁就稱之為一個「抵」玩嘅假期。
另一款係「懶」字行頭，完全冇計劃，去到一個地方，暫時放下了手頭上的一切，除了腕表，關掉手提電話、傳呼機，附近總有幾本書，喜歡便翻翻書，眼瞓便瞓覺，醒來後想瞓又瞓過，再醒來後重想瞓又瞓過，直到真正覺得想起床才起床。不會想𠵱家香港幾多點，也不會理當地現在幾多點，反正身體會告訴你甚麼時候肚餓，肚餓便吃東西。
我較喜歡後者的假期，腦中不用想太多反而會想得更多，想的是一些平時不會想的，這樣的假期能令腦袋行開吓，這樣便能看到自己，看到自己平時做的一些對的或錯的事，對自己有更多的了解、體會。這個假期我沒有想很多，但想到了很多，腦中閃過的一些片段都零碎地寫在心愛的記事簿上。回程時，翻開記事簿看看，原來這個假期雖然懶，雖然唔抵玩，但很充實，絕對好玩。