周三國際友賽戰火連天，近年八月中呢輪國際賽，開下盤比率甚高，不過今年意、西、德、法、荷等足球大國都易帥；而且今次首度採用國際足協頒布友賽最多換六個人嘅新例，以上因素會唔會令呢個旺亞洲盤下盤賽序出現變數，絕對值得關注。
大部份球員歇暑後缺態，所以過往呢輪賽序總有啲意外戰果，例如前年意大利主場輸畀斯洛文尼亞、法國被突尼西亞迫和同埋巴西輸畀巴拉圭等等；舊年就冇咁多冷門，但亦出現葡萄牙主場對哈薩克只能僅熟贏一球，整體而言開下盤比率肯定高過上盤。
不過今年特別多新帥上場，話唔定想爭響頭炮；而且新例杜絕各隊教頭起勢換人，以往英軍領隊艾歷臣上、下半場幾乎用兩批人試陣，睇怕難故技重施。換人數目少咗，對戰局影響相對細埋，落注前至好記得計埋上述因素喎。
意大利隊教練納比冇選迪比亞路鬥冰島，傳媒問完一次又一次；日前終於引到納比首次開腔彈迪比亞路缺態，話佢一日唔操弗狀態，國家隊就免問。堂堂「金童」被以往球會教練兼國家隊教練公開猛彈，消極啲會喪失鬥志，積極嘅就發憤圖強，即管睇吓迪比亞路屬邊隻嘞。
些路迪雖然係蘇超聯班霸，但原來外強中乾，有成一千五百萬鎊負債，唔怪得佢哋喺首席射手拿臣約滿離隊之後，只係從狼隊借用H卡馬拉啦！話時話，如果狠心啲喺去夏賣走拿臣，起碼執番幾百萬鎊，好過𠵱家一個仙都冇。佢哋財困，嚟緊幾年都係格拉斯哥流浪嘅天下囉。
皇家馬德里唔能夠喺阿仙奴撬走法國國腳中場韋拉之餘，重要有手尾跟。聽講阿仙奴對於皇馬偷獵韋拉好唔滿意，諗住向國際足協告狀；而查實皇馬偷獵其他球會嘅球星經已唔係第一次，但次次都冇俾國際足協處罰。所以我求大俠覺得，呢個彩阿仙奴都係攞唔到嘞。
奇連士文做咗德國隊教練即進行改革，以波勒代簡尼做隊長。奇連士文話以波勒做隊長，一來覺得呢位拜仁中場有感染力，二來就想改變一下，令隊波有新氣象；不過我求大俠認為奇連士文似乎想迫簡尼自己退出國家隊。講真簡尼近兩年水準係咁跌，係時候諗吓從國際賽引退。