金融風暴後，大摩基金狙擊商業投資項目不遺餘力，買完一幢又一幢，先是上環維德廣場，然後又有九龍城廣場，殊不知呢位投資老手，亦曾經喺九七年，寫字樓市熱火朝天之際，以天價兩億三，即每呎一萬六千幾，買下皇后大道中九號二十四樓，成為蟹貨。
大摩持貨七年，痛定思痛，決定趁寫字樓市道過去半年大幅反彈，壯士斷臂，委託仲量聯行，將全層拆細七個單位出售，由七百餘至二千八呎，呎價九千二至一萬零二百。
皇九最近曾經做過每呎逾萬成交，較今年一月勁升近五成，不過，大摩即使可以順利沽貨，埋單計，帳面仍要蝕近一億，約四成。
雖然已經做咗兩輪大型內購，西灣河嘉亨灣宣傳活動原來重未完，噚日又再介紹會所「音樂天地」。
入伙之後，會所會舉辦唱歌、鋼琴樂器及粵劇等興趣班。歌星方伊琪、曾航生、李健達等，都會喺嘉亨灣開班授徒。
蘭西覺得，呢個導師陣容似曾相識，記得恒基大角嘴港灣豪庭周末嘉年華會，以上幾位都係表演嘉賓席上常客。
幾位噚日重即席獻唱，開記者會十足十登台，另外重有劉詩昆鋼琴藝術中心導師表演，娛樂性豐富。
樓市又再熱鬧番，地產代理監管局對代理違規行為好關注，主席潘國濂噚日同四大代理行高層負責人會面，要求佢哋採取適當措施，積極改善新盤銷售地點秩序。
潘國濂話，已經加派人手巡查，指由七月二十七日至八月十五日，共發現有九十宗代理涉嫌違規個案，已經展開調查。
蘭西記得，地監局月初公布過一次代理違規數字，𠵱家又再提，可見該局睇得幾緊，唔怪得地監局要用到「非常重視」嘅字眼啦！
新鴻基地產請咗有三十年酒店營運與管理經驗嘅布朗特，做集團酒店部營運副總裁，除咗負責提升新地酒店質素及營運效益，梗係要負責埋籌備與策劃未來酒店物業，好似中環四季酒店，以及尖沙嘴九龍站酒店項目。
布朗特七六年喺美國大學酒店行政學院畢業，曾撰文講酒店發展與管理心得。佢管理嘅酒店，攞過唔少獎項。
樓市向好，連夾屋都成為買家入市對象。中記黃良昇話，首八個月有九十四宗二手夾屋登記，已經多過舊年全年。總值一億六千八百萬，多舊年兩成二。
最受歡迎係青衣宏福花園，有二十一宗，拋離第二位馬鞍山雅景臺一半。
銀碼最大係逾八百呎一類，沙田晴碧花園一座中層G，近八百八呎，四月作價近二百九萬，每呎近三千三，比沙田第一城三十四座中層八百七呎D室，呎價逾三千，重高八點六巴仙，相信無人估到。其他夾屋成交價一般比同區私樓低一兩成。
蘭西
電郵地址：
