全國人大常委曾憲梓呢排收晒口，忍住唔評論選舉政治情況，搞到社會少咗好多政治新聞。黑曾噚日出席鄧小平圖片展覽，八方隨口問佢：「擔唔擔心馬力病呀？」估唔到佢百無禁忌咁話：「我都病咗好多啦，病咗成十年都未死得！有病係會醫得好，無問題嘅！」
黑曾話畀八方知，佢係九龍東嘅選民。八方趁機問佢會唔會投大班一票呀？黑曾終於忍唔住口話：「絕對唔會投大班一票！佢唔鬧人之外，係冇乜好結果。」即係話，大班淨係識鬧人啦。至於支持要同民建聯劃清界線嘅嫻姐，定係裏外受敵嘅陳鑑林，黑曾就話要諗諗啦！
何志平噚日都有去個圖片展。肥平為咗鄧公真係唔話得，佢噚朝早八點先至喺雅典趕返香港，轉過頭就去睇圖片，聽講康文署遲啲都會搞番場鄧公展覽。左派同政府喺選舉前搞咁多鄧公展覽，唔知會唔會激發起市民嘅「愛國心」，曲線幫保皇黨拉票？
（圖）肥平（左二）同曾憲梓（右）一齊為鄧公圖片展剪綵。
傳真︰2623-9278
電郵︰