經紀黃話魏橋紡織（2698）可短炒業績，但噚日見報後，即跌2.5%，收11.70元。
不過經紀黃話唔使驚，上周佢品題利福國際（1212）後，股價一樣連跌多日，但噚日終於發力抽上，全日升8.6%，收10.10元。
小初心諗，講就係咁講，但唔係人人咁夠薑，冇膽者如小初之流，一早已被震走。
利福收市後，公布中期業績超靚，果然冇令人失望。
呢排大市氣氛麻麻，唔少優質股就算預期業績靚，但股價表現一樣唔多好睇，例如中國海外（688）在外資大行一致唱好下，股價仍然弱過藥煲。
經紀黃話，中國海外周三公布中期業績，由於賣樓賣得好，所以預期業績強勁增長。至於中國海外股價表現差的原因，估計除咗大市氣氛唔就之外，大陸宏調亦影響投資者對大陸地產股嘅睇法。
不過，中國海外現價較資產淨值折讓超過5成，如果業績對辦，夠條件隨時大反彈。
中國海外噚日跌2.9%，收1.34元，成交股數634萬股，金額861萬元。
慕容小初