陳豪、廖碧兒及劉愷威最近被指大搞五角戀，但據本報了解，廖碧兒已經與劉愷威分手，而陳豪亦與圈外女友分手，兩人齊齊回復自由身。陳豪與廖碧兒還大方於凌晨約會，被問到可有發展機會時齊說：「將來嘅事將來至算啦！」
無綫力捧的小生陳豪與花旦廖碧兒，被傳因拍攝澳洲旅遊特輯及電視劇《妙手仁心III》而擦出愛火花，日前廖碧兒更駕車到陳豪西貢住所短敍兩小時。由於陳豪已有一位馬來西亞圈外女友，而廖碧兒的緋聞男友劉愷威又被傳媒拍下與一女子手拖手夜蒲，令這段五角關係變得錯綜複雜。
不過據悉廖碧兒與劉愷威其實已經分手，至於陳豪亦與圈外女友分開，故此他們拍拖交往也實屬正常。
儘管陳豪與廖碧兒傳出緋聞，兩人仍不避嫌見面，昨日凌晨時分陳豪相約廖碧兒與一女性朋友到紅磡都會海逸酒店會面，提到廖碧兒到其住所短敍一事，陳豪解釋說：「嗰日佢同我傾《妙手》劇本嘅嘢，同埋攞阿Sam演唱會飛畀我媽咪，我媽咪啱啱喺澳洲返咗嚟，當日廖碧兒嚟我屋企，我媽咪都喺度。至於講到點解我要用車冚冚住廖碧兒部車，係因為我驚狗仔隊見到會有誤會。」
陳豪與廖碧兒各自的座駕均選用同款蜘蛛俠太陽擋，看來關係親密，陳豪笑說：「我見佢買咗個太陽擋幾靚，我咪跟住買囉，點知會惹嚟誤會啫！」
對於有報道指陳豪與廖碧兒及劉愷威大搞五角關係，陳豪說：「人哋嘅事我唔清楚，但我已經同圈外女朋友分開咗！現階段我同廖碧兒係好朋友關係，佢係一個好女仔，我好欣賞佢工作好努力。」
廖碧兒承認日前的確曾到訪陳豪住所，問她與劉愷威是否已經分手，廖碧兒說：「我同愷威一向都係好朋友，佢今日去內地拍劇，我都有打電話問候佢。陳豪係好男仔，亦係我拍檔好朋友，我當日真係攞飛畀佢媽咪，同埋傾劇本啲嘢。」那麼兩人將來可有機會發展？陳豪與廖碧兒竟同一口脗笑說：「將來嘅事將來至算啦！」
問陳豪會否因緋聞而跟廖碧兒減少見面？陳豪肯定地說：「絕對唔會！」
