立法會912投票，政府日日出推廣廣告，都冇教人點投先至可以投到自己心水人馬入會，八方老友見難度咁高，姑且教大家唱吓數字歌，要泛民主派勝出，選民要心中有數。
香港島可投3、4、6。3號係阿牛，4號楊森加馬丁，6號余若薇加何秀蘭。如果要響應余大狀1+1=4嘅口號，就毋忘64，一個人投6，另一個就投4，送晒余何楊李4人入立會。
九龍西可投2、3、5、6。2號係馮檢基，3號阿石，5號係涂謹申，6號係廖成利，目前阿涂較有利，如果多人投佢條名單，可望取多一席，帶排第二嘅陳家偉入埋立會。
九龍東投1、3、4。1號係李華明同胡志偉，3號係鄭大班，4號係梁家傑，李華明同大班出線冇問題，梁大狀反而要加倍努力，吸番多啲票。
新界西人多名單眾，可投名單包括1、2、3、4、11、12，1號係陳偉業、2號係達仔、3號係何俊仁、4號係梁耀忠、11號係李卓人，12號係嚴天生。
至於新界東就好簡單，一係投1號梁國雄，一係投鑽石名單3號。3號張名單有鄭家富、劉慧卿、湯家驊、黃成智同埋蔡耀昌等，佢哋大大需票，多多冇拘，否則好難保證幾個全部都入到立會。
傳真︰2623-9278
電郵︰