八方家住沙田，呢輪無論行到邊度，都見到自由黨主席田北俊個笑笑口嘅樣，可見富貴黨果然不同凡響，有民主派人士就話，選舉法規定，選舉經費按名單計算，新界上限係二百五十萬，田少一人一隊，泛民主派七個人一隊，一樣只准使咁多。
不過，八方就笑佢哋無謂呻，畀你每人可以使二百五十萬，你都冇千幾萬咁多錢，當然今年有新猷，就係有錢攞番，只要得到多過百分之五嘅票數，每票可以同政府攞番十蚊，最多可以攞到一半嘅選舉開支，算係幫輕吓。
講番田少，佢最近喺獅子山隧道口掛咗一幅極大海報，寫住「你的心聲，我聽到，我做到」，八方問要幾多錢，自由黨中人話排到912，一個月五至六萬大元，真係有水。
田少的確好嘢，未發生何偉途事件，已經叫特首幫民主派攞番個回鄉證，等啲民主派候選人返晒大陸，投票前都唔好返嚟，點知啲民主派咁蠢上當。
（圖）田少喺獅子山隧道口嘅大海報掛一個月要五至六萬元。
陳亮華攝
傳真︰2623-9278
電郵︰