民意調查顯示，有七成市民將會投票，另外喺兩屆7.1大遊行嘅總人口裏面，重有九成人話會投畀民主派。原來五十萬人大遊行人口，係民主派嘅大票倉。
不過說話雖然係咁講，民主派都唔係贏硬，反而好多件告緊急，包括李柱銘。因為選舉機制複雜，一投就投成條隊嘅飛，配票左穿右插，要計算到好似碧咸扭波抽送俾人射龍門咁。加埋類似九龍東嘅地區，多左件大班搞搞震，又話要做票王，民主派一定贏唔到半數。
中方最驚民主派贏多過半數，「變天奪權」，到時成個政府搬咗過立法會。呢種恐懼，係出於無知。美國國會都唔知試過幾多次共和黨入白宮做總統、國會就由民主黨佔多數，又唔見美國政府會癱瘓，美元冧檔？國會由反對派佔多數，並非世界末日，不過對於特首及其班子，所需求嘅政治技巧就會高好多。
只不惜，過去七年嘅現實顯示，就算成個立法會由親中保皇人士佔多數，個政府都無法兼無力統治，自己佔咗立法會嘅自己友優勢，都冇法子「行政主導」，何況九月之後民主派又多幾席？
問題梗係唔係出在民主派，而係行政能力疲弱，不過自己冇用，就梗係要虛報軍情，話畀中方阿爺知九月後香港實會變咗顛覆基地。除非咁，寄望九月十二日投票之前打大風，掛起十號風球，全港大亂，特區政府以社會穩定及以市民生命安全為理由，無限期擱置立法會投票，好似擱置23條一樣，或者可以博到懵，維持現狀都唔定。
至於選民，民主派梗係有幾個唔係咁選得落手，不過今年選舉，經已未必係講緊「選賢與能」，選個理想嘅立法會，而係「選廢與不能」，首要係將啲衰嘅、廢嘅、邪嘅，用選票阻止佢哋入立法會。喺一個爛橙，同埋白雪公主後母所奉獻嘅毒果之間，梗係選隻爛橙好啲，因為食咗唔會死人，最多都係屙嘔兩日。
所以今年投票，無謂諗咁多，本住良心去投，唔好投畀啲賣港小人就實冇錯。至於係民主派過半數，定係「愛國」者佔主體，咁就聽天由命。分分鐘個立法會選咗出嚟，無法代表足夠民意，明年7.1又谷多一鑊大遊行，呢啲嘢，就交番畀北京以後頭赤咯。
傳真︰2623-9278
電郵︰