電影《千機變II》首日開畫便錄得逾200萬元票房，成績斐然，除了是幕前幕後工作人員的功勞外，後期電腦製作亦居功不小，因有半數鏡頭都是採用了電腦動畫及特別效果（CG）。從前投身電影動畫師非有紮實的美術根基不可，但現在只需基本電腦知識便可報讀有關課程，半年後更可參與電影、遊戲及廣告等製作。
記者︰陳漢威 攝影︰陳盛臣
Case1
「一直以嚟我對動畫師嘅工作都好有興趣，但以前好難先搵到機會入行，讀咗呢個課程令我可以夢想成真。」23歲的阿焦一直對電影充滿熱誠，中五畢業後便到了製作公司出任助理，剪片、字幕、特效等一腳踢，一做便是四年，公餘時還報讀了有關電影動畫及特別效果設計製作的文憑課程。
「由於主講導師都係現職嘅動畫及特別效果製作人，所以教授內容相當實用，重會播啲廣告或者電影片段畀我哋睇，等我哋加深印象。」課程結束後，阿焦由於表現出色，被派往萬寬電腦藝術設計有限公司（Menfond）進行在職培訓，於是他決定轉行。「入職初期最主要擔任一啲簡單嘅工作，例如抹吓威吔或做廣告StoryBoard，但可以學以致用，好有挑戰性。」阿焦除了不斷參考有關書籍外，更加強軟件及電影的進修，務求令自己的作品更進一步。
Case2
「課程完畢後，同學多數都搵到嘢做，有啲去咗廣告公司，有啲去咗做電腦Game。」19歲的Felix雖然會考成績不理想，但年紀輕輕便已成為動畫師。完成了IVE的電腦文憑課程後，Felix報讀了有關電影動畫及特別效果的文憑課程，並成功在畢業後覓得動畫師一職。「自己一直都對Drawing好有興趣，於是就喺Uncle鼓勵下讀咗呢個課程，之後更激起我對動畫動態嘅興趣，因為動態部份會牽涉好多唔同嘅嘢，所以好刺激，好好玩，希望可以喺呢方面繼續發展。」
「其實外界對電影動畫嘅工作認識唔深，親戚朋友問我係咪成日見到明星，但其實我哋多數喺場戲拍完先開始，絕少會去片場做嘢，只會喺電腦經常見到佢哋。」Felix表示當動畫師最重要是分析力及腦力，因為動畫師不是操縱電腦軟件的程式員，所以腦海一定要經常思考，提高創意。「就算一個畫面或者一個簡單動作，都需要充份計劃及思考，務求發揮最佳效果，少啲腦汁都唔掂。」Felix笑說，電影動畫師最大的成功感在於看到自己的作品得到觀眾認同。
「初級動畫師薪酬約$6,000至$8,000，須視乎學歷及作品質素而定。」MenfondCEOEddyWong表示，就以《千機變II》為例，就動用了全公司50多人達4個多月，對初級動畫師的人手需求相當大。「你睇𠵱家好多電影都用電腦特技就知，動畫師更可以從事電影、廣告、動畫、遊戲等製作，出路相當廣。」Eddy更透露，初級動畫師累積一定經驗及工作表現，便會晉升至高級動畫師，最後會成為部門主管。「在職動畫師可報讀本地大學課程去增值自己，以往更有兩名同事專程花兩年時間到英國進修電腦動畫，提升水準。」
電影動畫及特別效果設計製作文憑課程（240小時）
主辦機構︰生產力促進局及萬寬電腦藝術設計有限公司（Menfond）
內容︰人物設計、三維建模、動作、動畫及影像合成、場景及氣氛設計等
開課日期︰日班︰8月27日逢星期二、五10:00am-5:00pm；夜班︰8月26日逢星期二、四7:00pm-10:00及星期六2:00pm-5:00pm
學費︰$30,000 查詢︰27886069
三維動畫製作專業文憑課程（120小時）
主辦機構：軟硬體
內容︰電腦美術製作、向量式繪圖軟件理論及應用、FX特效製作、材質設定、模型製作等，並設參觀及實習
開課日期：8月27日逢星期五7:00pm-10:00pm及
星期日9:00am-12:00nn
學費：$12,500 查詢：21361234
