後日三十二歲生日嘅鄭秀文（Sammi），今年冇男友喺身邊陪佢，前晚佢就同二百幾個fans喺白石海天燒烤場舉行燒烤會，預祝生日。
Sammi夜晚八點幾到達，佢一出現就搞到全場歌迷尖叫，Sammi話：「雖然未真係老一歲，但我好開心可以同咁多歌迷慶祝，今日重有Boy'Z嘅翻版Steven㖭。」原來Sammi講緊嘅係嗰晚燒烤會嘅男主持。
之後fans就送禮畀Sammi，重有歌迷錫面祝賀，Sammi講笑咁話：「冇禮物唔好行過嚟呀！」Sammi見到啲細路仔嚟送禮時，佢就興奮到係咁同佢哋傾偈，又錫嚟錫去，玩得不亦樂乎。
Sammi主演嘅電影《長恨歌》就嚟開拍，佢同馮仁昭話：「我要學社交舞、織冷衫同國語，因為個角色係要一邊織冷衫，一邊講啲四、五十年代腔調嘅國語。」
安雅噚日喺台灣拍攝新劇《失戀高跟鞋》，呢套劇係《色慾都巿》嘅翻版，為咗配合劇情，安雅就自備咗套比堅尼泳衣，展示優美身材，安雅用國語話：「我以前在美國都是習慣穿比堅尼，就算在台灣也穿比堅尼，我覺得沒有甚麼特別。」安雅身材咁好，梗係點晒都得啦！
陳可辛監製、陳果導演以及楊千樺主演嘅《餃子三更2之一》今晚首映，噚日陳可辛同陳果喺尖沙嘴做訪問，話部戲俾電檢處列為三級片，搞到𠵱家亂晒陣腳。呢部戲因為有千嬅食嬰兒胚胎嘅鏡頭，意識幾大膽，搞到點刪剪都走唔甩三級命運。而威尼斯影展亦因宗教問題放棄邀請佢哋參展。「雙陳」重話千嬅有好多未成年fans，佢哋入唔到戲院睇，對票房實有影響！
周星馳前日去咗廣州宣傳電腦遊戲《大話西遊》，星爺為呢個電腦遊戲做咗幾年代言人。
星爺話呢排都係忙緊做電影《功夫》嘅後期，呢部戲聖誕節時應該可以上映。拍完《功夫》後，佢又會籌備新戲。另外，星爺早排話要拍《食神》電視版，咁啱同佢反目嘅李力持噚日喺上海開記者會，宣布開拍《中華小當家》，亦即係《食神》電視版本，搵蕭正楠演出。而李力持重講到明要超越星爺，擺明向佢挑戰。馮仁昭覺得李力持都算大口氣！
最近內地中央音樂學院彈撥樂總監兼琵琶演奏家章紅艷接受內地訪問時，公開話女子十二樂坊雖然做得好成功，但就唔算「代表中國民樂」，章紅艷重話：「我知道她們在現場演出時，所發出的樂器演奏聲並非來自她們親手彈奏，而是來自幕後早已準備好的音樂磁帶或CD。」對於呢番言論，十二樂坊經理人王曉京知道後好嬲，身在美國嘅佢重話返中國後要告人咁話。
