港股噚日大跌，個勢變得好差，恒指上周五跌穿10日線（12381）後，噚日連20日線（12328）同50日線（12221）都失守，100日線（12179）亦危在旦夕，短期支持在上升軌12000水平，若跌穿，相信11800亦未必守得住。
油價係咁升，股市壓力就愈來愈大，噚日油價又創出新高，一日唔停步，股市都冇得好。個別股票就以隻銀建國際（171）表現較突出，收1.91元，升8仙，成交更大增至超過3000萬股。上禮拜銀建高價曾見1.99元，今次調整後再上，升破2元後初步目標係2.25元。
國企跟大市調整，國指收3965，跌46點，但金屬股表現較硬朗，江西銅業（358）同3隻鋼鐵股都屹立不倒。由於內地鐵路運力緊張，電煤要率先付運，令到沿海地區的鋼材供不應求，若干高檔產品的售價，已由低位大幅回升，個別且接近宏調前的水平。目前內地和海外對鋼鐵產品的需求極為殷切，相信鋼價的跌勢已告一段落，即使到9月運輸緊張的情況略為紓緩，鋼價亦只會略為調整而已。
鞍鋼（347）今年上半年營業額98.8億元（人民幣．下同），升42%，獲利7.16億元，升15%，仍比市場預期為佳。期內，原材料價格雖然上升42%，但集團產量增加22.9%至259萬噸，而平均價格亦上升22%。
今年首季，集團獲利2.8億元，而第2季雖有宏調衝擊，但盈利反超越4億元，主要原因係原材料降價的幅度，較產品降價的幅度為大；同時，由於外銷價格較內銷高15%，集團增加出口，亦令毛利率上升。今年上半年，集團共出口32.3萬噸鋼材，較去年同期上升2.65倍，並計劃全年的出口量提升至80萬噸。
04年度（12月年結），估計鞍鋼盈利約14.6億元，升1.9%，每股盈利0.49元（折0.462港元），派息0.2港元，預測PE5.5倍，息率7.8厘，已值得持有。國企調整完成後，鞍鋼股價有機會重上3元水平。
馬鋼（323）同重鋼（1053）業績快宣布，睇定可落手。
郭兆誠