早前曾多次傳出婚訊嘅富家女ParisHilton，日前俾二十歲嘅細妹Nicky爬頭出閣。據講Nicky前日凌晨喺賭城拉斯維加斯下嫁現年三十三歲、任職財務顧問嘅ToddMeister。Nicky今次結婚據講係一時興起之所至，估唔到平時「咁」低調嘅Nicky，原來重衝動過癲癲得得嘅家姐。
美聯社日前得到一份法庭文件，證實Nicky同比佢大十三年嘅舊愛Todd結婚嘅消息。據講Nicky日前同Todd、Paris、NicoleRitchie、演員好友碧珠菲臘絲（BijouPhilips），專程去賭城出席《Stuff》雜誌嘅活動，點知Nicky同Todd喺周六食完晚飯之後，突然話要結婚。
據報道，Nicky喺結婚前重同家姐Paris去shopping，一啲都冇準備結婚嘅徵象。點知當晚同Todd食完晚飯後，由Paris同埋好友碧珠菲臘絲見證下喺賭城嘅拉斯維加斯結婚教堂行禮。到現時為止，希爾頓家族重未發表任何聲明，至於身為希爾頓酒店集團繼承人之一嘅Nicky，有冇喺結婚前同老公Todd簽定婚前協議書，避免離婚時俾人分身家，暫時重係一個謎！