潮界金牌經紀大隻標熱愛足球，早排聽講佢飛咗去日本睇皇馬賽事電視直播，並順道帶貨返港幫補水腳，返港後眉飛色舞分享所見所聞，聽得現場一班潮流小Fans如癡如醉。
佢話：「自從碧咸加入皇馬後，成個球隊啲人都潮晒，就以呢次去日本為例，唔知邊個咁醒，識得落原宿買嘢。最初想去竹下通，但礙於保安理由，竹下通太窄太多人，所以臨時取消行程。改去一條馬路之隔嘅裏原宿，唔知有人帶路定佢哋自己咁醒，竟然有隊員摸咗落去地庫BusyWorkshop，店員認得古迪同沙加度，立即打電話畀大佬Nigo報告，大佬叫班細嘅記得要好好招呼班球星，同叮囑畀5折佢哋。班馬騮服侍功夫應該幾好，古迪同沙加度笑晒口離開，手拎一袋二袋戰利品。」
「第二日南青山間Bapexclusive於五點幾停業45分鐘，好似話係朗拿度入去睇嘢。其實朗拿度同香港人口味好接近，喺香港時就去睇足金廁所同蒲老蘭，去到日本就行Ape。唉，講時講，大家都係踢波，唔知我哋香港嘅李健和同山度士去到有冇咁好待遇？」
主持人：大食Jack
八卦熱報：