到陸羽飲茶，餐廳羅巡視蘭桂坊分店之後殺到，面色唔多妥。飲啖牡丹茶，坐定定之後，餐廳羅話俾一啲網站大整蠱，損失聲譽，故此好激氣。
原來有一個網站聲稱與好多餐廳有好安排，優惠顧客大贈送，凡在該網站下載打印一張優惠券嘅，就可憑券到該食肆攞獎，登登登櫈，今個星期嘅大優惠就係××雪糕店，憑券可到該店免費攞雪糕！唉吔，呢間××雪糕店就係餐廳羅經營嘅，事發當日，有過百人拎住打印優惠券，上有××雪糕店招牌名稱Logo，去到××攞雪糕。夥計唔知乜頭乜路，又以為管理層搞宣傳新花款，唔敢話唔畀，但來客實在太多，畀晒嘅話，成日賣清雪糕都係得個桔，點搞呀？急call餐廳羅，了解情況之後，梗係閘住啦，跟住要去報警。但雪糕總代理話要查吓，知道美國有呢類網站，係真真正正做宣傳推廣嘅。餐廳羅就氣頂，佢從未有同任何網站講過宣傳、優惠，分明係特登整蠱啫。
上網實在太容易，年輕人尤其鍾意上網，你話佢哋喺網吧睇到××雪糕店有優惠，唔立即下載打印，走去攞雪糕食就有鬼。為咗防範呢類蠱惑嘢，食肆不妨在門口貼上海報，聲明「本店並無網上優惠券，恕不招待持券人。」到頭來，受到整蠱嘅係啲年輕上網人，白走一趟。以後各位上網，見到有餐廳優惠券下載，都係打電話問清楚先至好，否則興沖沖走上蘭桂坊食檸檬，好冇癮啫。
互聯網係二十世紀最大發明，改變晒全世界嘅工序運作，同時亦可以成為破壞力極大嘅工具，正是水可載舟，亦可覆舟，宜善用之。