近日城中話題莫過於談論兩大電視台播奧運嘅得失，我求大俠都嚟湊吓熱鬧。話說前晚深宵心血來潮扭去無記鬼佬台，喜見突然有場奧足意大利對日本睇吓，可惜負責麗音中文評述嗰兩位就有臨時拉伕之嫌，評述失色。咁大個電視台，出得麗音係咪應該專業啲？
我求大俠當時一路聽就一路同情兩位評述員，講波擺明唔係佢哋專長。佢哋對奧運隊球員名唔熟絕對情有可原，你問我求大俠都識唔晒，但評述期間連啲基本術語都講唔出。好似單擋、假身、推左走右呢啲動作出現唔少次，但就冇咩聽見，重有一次連日本隊單刀都講唔出，而局勢分析空洞自然唔在講。忽發奇想，唔知當時阿叔做緊咩呢？由佢壓陣至少似番「講波」。無記鬼佬台今晚深宵又會播阿根廷對澳洲，即管睇吓有關方面會唔會有所改善啦。
大事擴軍嘅車路士打開勝利之門，最開心除咗領隊摩連奴之外，當然重有喺貴賓席嘅班主阿巴莫域治。我求大俠睇住電視直播，就見到油王自從古莊臣入波之後，每次鏡頭影住佢，都係笑得好開心；尤其臨尾「同鄉」施馬田進攻二對二，雖然唔入，但都非常高興。講真我求大俠真係睇唔順眼，好似有錢大晒咁！
今屆奧運男子足球除咗「黑色力量」非洲球隊，我求大俠覺得重有一隊伊拉克都值得各位波友留意。呢支西亞球隊日前又淨贏哥斯達黎加兩球，兩戰全勝攞六分，提前出線，真係唔講得笑。原來，呢批伊拉克奧運腳，參加過早前亞洲盃，重話喺中國時學識點樣應付作客比賽，所以𠵱家嚟到雅典完全冇怯場咁話。
拜仁慕尼黑最近就搞搞新意思，同贊助佢哋嘅汽車製造商合作，將球員好似簡尼、波勒等曾經用過嘅汽車攞出嚟拍賣，希望借球星名氣，可以將批只用過幾個月嘅二手車賣到好價錢，而又可以用新款車贊助球星谷宣傳；不過，就冇講啲錢用途。我求大俠覺得，咁做都算係環保，好過攞架車去劏！