日本水着女星熊田曜子，咪睇佢身材咁fit，平日拍性感寫真時鬼咁搏殺，原來鏡頭後嘅佢思想好傳統，佢最鍾意整嘢食，然後將食物送畀朋友或者工作人員。當熊田見到大家大叫好食時個樣，就覺得非常滿足。
熊田早排接受雜誌訪問時自爆最近好沉迷煮嘢食。面對炎熱嘅天氣，佢重教用食物消暑㖭。
近排日本嘅天氣同香港一樣咁熱，東京重有成四十度咁高，不過熊田就話佢份人怕冷唔怕熱，而且重有獨門消暑秘方，熊田教大家將香蕉切成一節節，然後用筷子串起，放入雪櫃雪到變冰，食完成個人都透心涼，連冷氣費都慳番！
另外，熊田原來好鍾意整餅，佢每日返屋企經過超級市場時，都會買定大堆牛油麫粉，一有時間就會喺屋企焗蛋糕整曲奇，最後重要call埋班friends上屋企開大食會，佢話班friends重因為咁而送咗個焗爐畀佢做生日禮物。
𠵱家佢重努力學整pizza，完成之後就要畀大家品嘗一下，我大口羅拉就話做佢班朋友真係有口福喇！