中五會考放榜同埋中六收生程序經已塵埃落定，有幸升上預科嘅同學固然值得高興，即使成績未如理想亦都唔使灰心，記住條條大路通羅馬呀！
一如以往，會考狀元喺放榜翌日都成為各大報章頭條人物，皆因佢哋嗰張滿布「火箭」（A級）嘅成績單，亦係記載佢哋多年努力嘅奮鬥史，好值得他人學習，尤其好多考生屋企環境唔好，佢哋要比常人犧牲更多，先至可以考取佳績。
為鼓勵一班家境清貧但成績優異嘅學生，蘋果日報慈善基金轄下設有「蘋果助學金」，今年已經踏入第八屆。舊年助學金連破幾項紀錄，有超過一千八百人申請，經審核後共有三百四十名學生得到助學金，基金委員會撥款逾一百七十萬元，全部數字都係歷年最高。其中五名助學金得主聽日重有得免費參加康泰旅行社嘅五天北京交流團㖭。
○四至○五年度蘋果助學金暫定喺九月一日至三十日期間接受申請，「暖流版」稍後會作詳盡報道，大家記得留意啦！評審標準係以家庭經濟狀況、學業成績、操行、社工或老師推薦等項目作評分計算。大使喺度提一提大家，由於綜援家庭綜援金入面已經包括書簿津貼，為免重複資助，所以係唔合資格申請「蘋果助學金」。
另外，善長亦可以捐錢支持蘋果助學金專戶，等多啲清貧資優學生可以受惠。
蘋果「助學金專戶」捐款編號：C0601
暖流熱線
電話：29908688
傳真：23702192
電郵：
網址：