早排剪咗短髮嘅薛凱琪（Fiona），最近出現喺隱形眼鏡藥水廣告入面係長頭髮，啲人就以為係佢以前拍落，其實佢只係戴咗假髮，但係好多人就話佢長頭髮好睇過𠵱家個短髮，重話剪短頭髮嘅佢，望落去十足十隻長頸鹿。
噚日Fiona去咗上水出席「上水中心海洋世界」活動，佢就力撐話鍾意自己短頭髮，不過就因拍電視劇《學警雄心》太辛苦，食多咗嘢，搞到塊面冇晒輪廓。Fiona重話以前都試過紮起把頭髮影唱片相，都冇俾人話過，𠵱家相信只係有人想批評佢，所以搵嘢嚟講喎。
當Fiona聽到俾人話佢短頭髮似長頸鹿，就好晦氣咁話：「任何人都有缺陷㗎啦！我條頸咁長，咪可以戴十幾二十條頸鏈，加埋絲巾一齊掛喺條頸度囉！」馮仁昭好熱切期待戴到成頸飾物嘅Fiona。另外，對陳奕迅加盟華納，同佢做同事，Fiona大讚好之餘，重希望有機會同陳奕迅合唱。
廖碧兒噚日喺深水埗拍攝《妙手仁心III》，馮仁昭見佢講嘢嗰陣一時中文一時英文，講對白時，又將「跌咗支筆」，講成「跌咗個筆」，廖碧兒話自己好多時都會遇到呢啲情況，佢話：「我有時都唔知自己講錯㗎，佢哋笑完我又唔會講番正確嘅讀音畀我聽。」馮仁昭勸廖碧兒睇電視學習吓，咁咪唔使靠人囉！
官恩娜近日認真忙，前晚去完海洋公園活動，又要做許冠傑（阿Sam）個唱嘉賓，噚日重犀利，幫老友吳日言簽名會撐場後，又去咗西九龍中心出席反賭博活動，夜晚又再做阿Sam個騷，但官恩娜就一啲都冇疲態，佢重好開心咁話搵咗個設計師將佢同阿Sam嘅新聞剪報做咗一條裙，好有紀念價值咁話。
石修最近為護髮中心做代言人，由於廣告出街後反應唔錯，廣告商就再搵佢拍多一輯全新嘅平面廣告。不過石修今次冇靚女模特兒做拍檔，改為同花做對手戲。喺廣告入面，石修以「型仔花恤衫」、「悠閒瑜伽」同「斯文look」見人，石修話：「第一次為女性產品拍廣告就有咁好反應，證明我魅力真係能夠獲得唔少女士嘅垂青。」
劉丹同苑瓊丹噚日喺將軍澳電視廣播城拍《皆大歡喜》，苑瓊丹一見丹爺就話知道佢個仔劉愷威同廖碧兒分咗手，叫丹爺睇實個仔，唔好俾佢去北京拍戲時亂識女仔，問苑瓊丹係咪真係知道佢哋分咗手？苑瓊丹就話：「我都唔知，我問過劉愷威，佢話佢哋冇一齊過喎。」至於丹爺就話：「我唔嬲，佢不嬲瘋言瘋語，點會嬲佢呀。」
許秋怡前晚帶病到樟木頭演出《第三屆香港人旅遊節開幕儀式》，佢話自己早排去順德做騷嗰陣患上感冒，而且重唔小心傳染咗畀個女㖭！秋怡話：「BB燒到一百零四度，又出玫瑰疹，以前佢一早沖一次涼，喺家一日要沖六次幫佢降溫，近排我同BB成日喺醫院出入，我老公佢為咗照顧我哋，惟有推咗部戲。」
